尋晚pack好封信，先醒起今日係星期三.......
郵局逢星期三8:30am先開門.........

拎左返公司先算，
可能用公司附近既郵寄公司搞.......

同彭生傾左幾句，
佢同阿邪漫長既搵屋之旅....終於展開~~~~~
如果我仲係香港，阿邪一定輕鬆得多......呵

Facebook有張小學班照，係由阿Ling upload上去既，
但我一直無搵佢或留言，因為唔想再騷擾到佢依家既生活，
但最近張相愈黎愈多留言，同搵返多個小學同學，
我都好想湊湊熱鬧......所以今日我都係留左言係張相度~~~~

而今日我亦都add埋阿Ling，未知佢會唔會覆我~~~~~~
因為我諗返，當日係佢唔信我，覺得我對佢唔住姐，
我自問對得住天地良心~~~~~
再講，我都未免太自以為是，
我既出現仲點會有咁大影響呢？

夜晚Bonnie又搵我吹水，
又再講返佢小學時而我中學既生活~~~~
當年，某年某月某地我見過佢一d都唔出奇，
因為佢小學時都成日係我屋企或光輝圍機舖出沒~~~~
佢講得出既地方，以前我都一樣經常去~~~~

但佢講開機鋪，我又再記起一件好驚嚇既事，
曾經係荃灣機鋪，俾一個自稱(40K)既o靚仔逗.........
唔知之後佢有無俾人打死呢？亂Q咁撻朵........

臨訓前，見到海上有兩點青BB既綠光，
徐徐地移動著，用相機長鏡睇睇，
應該係船黎，不過就耀眼到睇唔到外型.........
耀眼程度就有如全船身在發光一樣.........
之後就一直停在海面上........好奇怪.........

聽朝早d出門口，因為我亦都想試試寄郵包既手續，
而順便亦幫公司寄掛號信兼收郵件，
所以都係決定去郵局一轉~~~~~~

天氣凍左好多，要著外套返工~~~~

一起身就俾彭小姐提醒小心豬流感，
返到公司仲send左個詳細既BBC新聞俾我，
但睇完後都係果句：nothing can do.........

想當年SARS肆虐，有日我同彭生收工後，
口罩都唔戴，就走左牛頭角下村巡視疫區兼食飯.......
還記得當年既九龍灣，尤如死城一樣.......

彭小姐叫我好買定口罩，香港已經出現搶購潮~~~~
買定都好既，總會用得著既~~~~~

Presentation轉左design，棄用3D轉用2D Flash，
效果幾好，但工序絕不少於3D........
最煩都算係要trace返哂D 巴士出黎.........

收工先去書局買防水信封，再去藥房買口罩，
我見到我之前果個人都係買口罩........
而且我買時只有散裝買，無一整盒買.......
藥房可能存貨都唔多，所以我都只係買左五個先~~~~

今晚好早就恰眼訓.....trace圖太耗精神~~~~
十點半忍唔住攤落床，十一點醒一醒，
起身pack彭生封回信，就索性熄燈訓覺~~~~~

九點零起身，彭小姐交左d功課出黎，
係台灣機票同酒店價錢資料..........
比想像中貴，尤其酒店~~~~
咁樣去一轉，$5,000以下無乜可能.......
彭小姐仲話港龍要盡早book，唔係就再貴d......
咁早就book有d難度.........
send埋俾彭生阿邪研究下先~~~~~

阿偉搵我傾計，佢公司都受海嘯影響，
而且都幾嚴重.......公司要行no pay leave.......
另將部門設於內地，一星期要返三日內地......
導致全公司已有一半人辭職.........
愈黎愈難捱.........

好多年前我上過幾堂Management，
好記得阿Sir講過：打工仔，當公司唔掂既時候，
如非必要都千析唔好走，當同公司一起捱過難關時，
老細有d人性既都唔會虧待你.........
加上依家咁既時勢，我勸佢唯有賭一鋪，
家陣仲要更加博d努力d添........就好似玩 [生還者]，
最後生存既就係贏家.........

不過，我返香港做既日子變得更渺茫~~~~

由只知道壞的一方面，而去評估一個人，
雖然有欠客觀，但如果可以幫到一個人去釋懷，
又未嘗不可既~~~~~~

今日先知.......
呢個星期返三日工，又係一個Long weekend~~~~
真係放假放到有d悶添........呵

十點零俾走廊既叫聲嘈醒，望出窗依然多雲大霧.......
訓係床度仲聽到d叫聲.......貓叫？.......
我以為有貓蕩失路........即刻彈起身~~~~~
但再行近d門口時，發現有d唔對路........
meow......meow.........help......help.........
係有人喊救命？我打開門睇睇~~~~
隔離單位已經有人行左出黎.......原來係困lift.........
咁我無行出去，因為衣衫不整，頭髮蓬鬆.........
仲以為會執到隻貓黎養添........

已經醒哂，唯有開機上網~~~~~

幫彭小姐研究點裝PS9........傾左好耐，
但由頭到尾，我都仲未搞清楚.......
到底佢個問題係邊度........唯有等佢燒左落碟先再試

今日執屋，洗廚房、抹廳、吸塵，
見天氣開始轉好，就抹埋五隻大玻璃窗.........
過程有驚無險........以前都算習慣高空工作，
不過俾人見到抹得咁危險實鬧死...........

夜晚MSN見到彭小姐訓醒起身online，
同我講佢懶根大作，唔想返工..........
不過佢都係呻下，最後都係返左工~~~~

詐病唔返工........我應該唔係未試過，
但真係唔記得係幾時既時.......
至少2000年之後，都肯定未試過.........

夜晚做做運動打打機，hea到兩點訓~~~~~

十點零醒左起身，望望下窗又係大霧兼有雨......
嗯，反正凍冰冰無野做，都係再訓多陣......

一訓就訓到三點幾先醒，出面天氣都係一樣，
一滴陽光都無，唔怪得我咁好訓.......

全日都幾涼，室內都只有廿度~~~~

Aaron尋晚msn話今日會上黎，不過都係無蒲頭~~~~~

夜晚睇左[禮儀師]，又再一次見識到日本電影既認真程度.......
廣末涼子比少女時既佢更加靚..........
以前我係覺得佢個樣係有d怪.......
完場時睇到音樂係久石讓~~~~
難怪幾好聽同d旋律、編曲都熟口熟面~~~~~

Bonnie係HK時間兩點先上MSN搵我，
一上黎就話呢期玩緊自閉，問左佢兩次先講咩事......
原來係唔知自己想點？
突然好迷茫，人生無乜目標~~~~
所以成個月都好懶，咩都唔想做........
唔怪得成個月都唔見佢online........
佢正處於怠懶期.......
加上之前去旅行返黎，玩到成個心都散哂~~~

長遠目標並不是所有人都會有既，
但短期目標就唔難set~~~~
生活太悶.......我提議左佢試下從未試過既野，
學下其他野，未必一定係有用既野，
興趣班都可以，純粹去發掘下其他興趣~~~~
但佢竟然話想運動類.....真係估佢唔到.....
咁叫左佢去試下yoga先啦~~~~~

長遠目標嗎..........我好似都無特定既一個........
唔使大富大貴，但生活無憂無累......
咁樣算唔算長遠目標呢？

尋晚做到四點終於做好........
唔到最後一刻都嘔唔到野出黎.............

但今朝起身時，香港那邊沒有comment，
Ben話正在忙著別的工作.......總覺得白忙了一晚......

繼續嘗試做巴士model，
始終還有很多技巧還不知道.........要再努力d.......

返去開左彭生寄黎既補給，睇左 [家有喜事2009]~~~
黎緊又有三日假期~~~~~
聽日喪訓返一日先~~~~~~~~

返工前去郵局收彭生郵件，一拎上手......
咁厚既？.......拆開一睇.......裡面有本太公報~~~~
哈，呢鋪有排睇囉~~~~~

阿邪既婚前躁狂症開始發作.........
仲有大半年就發作.......早左d喎~~~~~
躁狂點都好過抑鬱，躁狂差唔多係每對新人必經階段~~~~

買左Lunch先記得，
今日約左Chad去Pasta Factory食Lunch.......
橫豎都係，雪住份三文治留返今晚OT食~~~~~~

今日都算忙，想偷雞做Arthur既野都無時間.......
做到六點先開始做自己野.........
做到七點半總算搞掂，但都仲係得一款........

返到屋企開電腦MSN又有問題，
Download新version又用唔到........
再重裝返舊版，又用得返.........
無端端o徒左成個幾鐘.............

左下顎喉嚨位置好似有少少腫痛......

寫完呢篇後，睇下可以捱到幾點.......
希望做多一款出黎........

唔知醒.......起身時已經八點半.....
應該係唔記得較鬧鐘...............
好彩今日唔係weekday......

九點半左右返到去，通知埋Aaron後，
就正式開工~~~~~~~
而Aaron12點前黎到~~~~

真係好邪，尋日我真係有預感今日會見到Murray.....
今日竟然真係見到佢........仲要Aaron係度~~~~~
我無記錯咁耐都未撞過佢假期返公司..........

佢無理我地做咩，逗留左半個鐘左右就走左~~~~~

兩點先出去買野食，問Aaron食唔食野？
佢話無帶錢出街.........咁我請埋佢又點話~~~~~
不過佢真係好窄..........

Aaron留到五點半先走，臨走前話佢好多晚都想上黎我度，
但老婆夜晚要返工，所以要睇住Delan行唔開.......
講到我好似好想佢上黎咁.........
嗯，你黎唔到我真係無所謂架~~~~~

我做到七點半先搞掂一款.....進度好慢........
之前做左幾個都唔滿意再重新做過..........
send住俾Arthur佢地先..........要返屋企，好累~~~~~~

返到去唔想再做，做到有少少頭赤.........
今晚早少少訓啦.......早少少.........

中午又有Group Meeting lunch，今次無咩特別事，
主要都係歡迎新同事&坐埋一齊食返餐~~~~~
Blonde帶左佢整既quiche蛋餅，好好味~~~~
我都食左五六件~~~~~

我話覺得彭小姐對待男友時，既野蠻又任性~~~~
佢就話：我係港女！！~~~~
妳自己自首咁ok啦~~~~
無可否認妳真係香港土生土長既女性黎既~~~~呵

Déborah夜晚問我聽日先係咪假期？
聽到我有野做後，就問我會唔會返公司？
因為Adam要Aaron search 一D巴士廣告資料，
Aaron又好緊張做唔黎，佢只係返星期三四，
聽日又係假期.......所以問我可唔可以叫埋Aaron返公司？
我就唔知好唔好，驚撞到Adam或Murray既話，
唔知佢地點諗..........
因為我覺得Adam都係求其搵D野俾Aaron做
所以根本無必要咁做，
加上都唔知佢算唔算公司既正式員工.....
即使老細們唔介意，
立場上我都唔應該帶任何人黎用公司既電腦~~~~~
而Déborah就話Aaron返公司做野，唔覺得會有咩問題.......
既然妳咁講，我都無謂講落去..........

當然，Déborah仲有一個原因想Aaron返公司啦.......
我要詐唔知姐~~~~~~

夜D收到Arthur另一次較詳細既資料~~~~~
雖然比想象中複雜得多，不過都係留返聽日先做......

又拎張尋日上Facebook搵到既小學相出黎睇，
好好笑之餘亦都好遺憾~~~~~~

聽日假期，但都想正常時間返公司，
因為要就返香港時差.........

今日凍左好多.......
一返公司就收到Arthur，有job要我幫手，
不過等左佢成日都未得閒同我傾點做.........

今日又有新女同事返工，又係專責Dubai既工作~~~~~
睇黎公司搬去Dubai都真係唔出奇..........

帶左尋日d相返公司，之後Simon經過我位時，
問我到底影左幾多張啦啦隊姐姐相？
原來d相一致得到男同事既高度評價~~~~~~呵

放左工先記得Arthur仲未搵我.........
返屋企搵大姪女叫佢online~~~~~~
星期五先要，咁我就可以星期三放假先做~~~~~

同佢傾左陣，因為前幾日Déborah話Arthur搵過佢，
一問之後，總算清楚依家公司發生緊咩事~~~~
大致上都與我無關~~~~~~
不過佢搵Déborah傾Europe既野，都算搵錯人囉........
識Déborah無耐，都已經知佢唔想留係Europe做野~~~~~
依家就更加唔使講添啦~~~~~~